MER LOSSE DE BAHN HE BOVVEN
Mer losse de Bahn he bovven
denn do jehürt se hin
wat soll die denn im Tunnel
dat hät doch keine Sinn
Dat koss bloß en Riesensumme
packt dat Problem nit an
/: Dröm sage mir üch: Loss dä Quatsch:
Bovve bliev de Bahn ! :/
En der Kölner Innenstadt Verkehrschaos
vill ze ville Autos ston em Wäch
Do kütt keine Stroßebahn mih züjig durch
mancher denk ne Tunnel wör nit schläch
Zwischen Heumaat, Nüümaat un dem Rudolfplatz
hät mer dann doch freie Fahrt
Doch su einfach es dat Janze nit
wemmer et mal jründlich üvverlaat
Eeezens koss dat Janze einfach vill ze vill
ohne dat et uns vill bringk
un et duurt Jahrzehnte bes et fähdich es
weil en Köln nit alles jot jelingk:
Am Waidmaat es zick 15 Johr e Riesenloch
de Oper es noch immer nit in Schuss
Wer jläuv denn weeklich dat dann su ne Tunnel klapp
dä Plan dä es em Jrunde Stuss
Mer losse de Bahn he bovven ....
Willste mal vum Nüümaat bes zum Rudolfplatz
jeiht et 4 Etage dief erav
un dann widder 4 Etage bes ant Leech
ze Fooß do hättste et schön längs geschaff
Mir bruche och kein lange 90meter-Bahn
De Autos müsse rus us unser Stadt
Mir bruche Jeld für de Verkehrswende
un Platz für Bahn un Bus un Rad
Mer losse de Bahn he bovven ....